ಅಮಲಿನ ಬೆಳೆಗಳು

,ಹೊಗೆಸೊಪ್ಪು:-
           ಹೊಗೆಸೊಪ್ಪಿನಲ್ಲಿ ವರ್ಜೀನಿಯಾ ಹೊಗೆಸೊಪ್ಪು, ಅಗಿಯುವ ಹೊಗೆಸೊಪ್ಪು ಮತ್ತು ಬೀಡಿ ಹೊಗೆಸೊಪ್ಪು ಎಂಬ ಮೂರು ಗುಂಪುಗಳಿವೆ. ವರ್ಜೀನಿಯಾ ಹೊಗೆಸೊಪ್ಪು ರಾಜ್ಯದಲ್ಲಿ ಸುಮಾರು ೧೨,೦೦೦ ಹೆಕ್ಟೇರನ್ನು ಆಕ್ರಮಿಸಿದೆ. ಇದು ಶಿವಮೊಗ್ಗ, ಹಾಸನ,ಕೋಲಾರ, ಚಿತ್ರದುರ್ಗ ಮತ್ತು ಮಂಡ್ಯ ಜಿಲ್ಲೆಗಳಲ್ಲಿ ಕೇಂದ್ರಿಕೃತವಾಗಿದೆ. ಈ ಪ್ರದೇಶ ಗಳಿಂದ ವರ್ಷಕ್ಕೆ ಸುಮಾರು ೬,೦೦೦ ಟನ್ನುಗಳಷ್ಟು ಹೊಗೆಸೊಪ್ಪು ಉತ್ಪಾದನೆಯಾಗುತ್ತದೆ. ವರ್ಜೀನಿಯಾ ಗೋಲ್ಡ್ ,ಕುಟ್ ಸೇಗ-೫೧,ಎನ್. ಸಿ. ೯೫,ಎಚ್. ಆರ್ -೬೨-೭, ಇವು ಮುಖ್ಯವಾದ ತಳಿಗಳು. ಅಗಿಯುವ ಹೊಗೆಸೊಪ್ಪು ೧,೨೦೦ ಹೆಕ್ಟೇರುಗಳನ್ನು ಆಕ್ರಮಿಸಿದ್ದು ಇದರಿಂದ ಬರುವ ವಾರ್ಷಿಕ ಉತ್ಪತ್ತಿ ಸುಮಾರು ೨,೦೦೦ ಟನ್ನುಗಳು. ಈ ಬೆಳೆಯನ್ನು ಹೆಚ್ಚಾಗಿ ಚಿತ್ರದುರ್ಗ, ತುಮಕೂರು, ಮೈಸೂರು ಮತ್ತು ಬೆಳಗಾವಿ ಜಿಲ್ಲೆಗಳಲ್ಲಿ ಕಾಣಬಹುದು. ಅಗಿಯುವ ಹೊಗೆಸೊಪ್ಪಿನಲ್ಲಿ ಬಾಳೆ ಪಟ್ಟಿ, ನಾಗರಹೆಡೆ, ಆನೆಕಿವಿ, ಕತ್ತಾಳೆಪಟ್ಟೆ, ಗುತ್ತಿಗಿಡ ಮತ್ತು ಜೋವಾರಿ ಮುಖ್ಯವಾದ ತಳಿಗಳು. ಬೀಡಿ ಹೊಗೆಸೊಪ್ಪಿನ ಬೆಳೆಯನ್ನು ರಾಜ್ಯದಲ್ಲಿ ಸುಮಾರು ೩೦,೦೦೦ ಹೆಕ್ಟೇರುಗಳಲ್ಲಿ ಬೆಳೆಯಲಾಗುತ್ತದೆ.